CATLAP TUANBIA

                     "Catlap Tuanbia"

*Cahram

Cun duhsah thluaimai in
April thlizil cung ah
nang le kei laam in kan thawk;

kan i seng____ hmun khat
mawra pakhat cung ah
thlatangpa a var zawn cun.

*Dal 1

A lawngmi catlap rang
biafang thlum nih an hlumh
i a thli te’n a cawlmi
rilipi phen le dingdi par cung
lungkil thli vennak;

kan hmailei a par
a kikmi Kum Thar tang i
caan nih diar in
dawtnak aan kan i thlen ah
lung a hmui hrim ko;

cun hmun khat te’n
hawikom dawtnak leng tiang
kar kan hlangtti.

*Dal 2

Kan paih
ni le thla, caan le kum
kan nih i teng kho lo’n
Tthal ninu ko nih
a kan zoh ah hawi a har;

kan nung, kan tlau
na’n kan ttial tthiamtthiam
minung pahnih
tuanbia pakhat catlang cung i
nihkhehnak aw;

kan laam
siseh Fuarpi ruah nih a suar i
kan catlap cinh in
tubungkhor ah lo ko a fenh.

*Donghnak Dal

Kan hla aa dinh zawn ah
ka ke thawn ka philh
i ruahti nih a tlak hnawh ca’h
ka lungthin a kuai;

Thlichia nih a sung a khan ko
na'n minmei a ngam kho hlei lo
i hlawt kaa huat__ cerlian,
fidi le muici sin in cun;

caan a liam
i cahmai aa thleng
nizan lawmhnak le
dawtnak a king;

cun kei___
kei kaa thawk tthan.

                                 -Fiakfairok